Сейм Польшчы прыняў бюджэт на 2025 год з усімі папраўкамі Сената. Верхняя палата парламента падала іх амаль 30. Сярод прынятых паправак: павелічэнне заробкаў дзяржаўных служачых, павелічэнне выдаткаў на фінансаванне дзейнасці афіцэраў сувязі паліцыі, змены ў бюджэтах Вярхоўнага суда і Вышэйшага адміністрацыйнага суда.
Закон аб бюджэце на 2025 год прадугледжвае, што даходы дзяржавы складуць 632,6 млрд злотых, выдаткі не перавысяць 921,6 млрд злотых, а дэфіцыт бюджэту дасягне максімум 289 млрд злотых. Рост ВУП складзе 3,9 працэнта, сярэднегадавая інфляцыя – 5 працэнтаў.
Цяпер дакумент мае трапіць да прэзідэнта Анджэя Дуды, але ёсць сумневы, што ён яго падпіша. Эксперты не выключаюць, што дакумент будзе накіраваны ў Канстытуцыйны суд.
Беларусам назвалі памер сярэдняй пенсіі ў краіне
У Міністэрстве працы і сацыяльнай абароны Беларусі назвалі сярэдні памер пенсіі па ўзросце непрацуючага пенсіянера.
“На сённяшні дзень сярэдні памер пенсіі па ўзросту складае 852 рублі”, – заявіла начальнік галоўнага ўпраўлення пенсійнага забеспячэння Мінпрацы і сацабароны Алена Гомарава.
З 1 студзеня 2025 года для атрымання працоўнай пенсіі па ўзросце ў Беларусі патрабуецца не менш за 20 гадоў страхавога стажу. Раней гэты мінімальны тэрмін паступова павялічваўся на паўгода кожны год.
У Менску зачыняюцца ўсе фірмовыя крамы Columbia
У Менску бліжэйшым часам зачыняцца ўсе тры крамы Columbia, даведаўся Office Life. Закрыццё адбудзецца пасля распродажу апошняй прадукцыі.
У беларускай сталіцы да апошняга часу працавалі тры крамы гэтага брэнда — у гандлёвых цэнтрах “Скала”, “Замак” і Green City. У іх прадаваліся вопратка і аксесуары для актыўнага адпачынку амерыканскай кампаніі Columbia Sportswear Company.
Апошнім часам у Беларусі нярэдка зачыняюцца гандлёвыя сеткі, якія маюць заходняе паходжанне. Летась зачынілася сетка дзіцячага адзення “Буслік”, асноўным акцыянерам і пастаўшчыком якой была польская кампанія.
Працягваецца набор удзельнікаў у Падляшскую эканамічную місію ў Асаку
Місія адбудзецца падчас Сусветнай выставы EXPO 2025 у Японіі і арганізавана Падляшскай маршалкоўскай управай, якая пакрывае выдаткі на ўдзел прадпрымальнікаў у паездцы ў Японію.
Набор праводзіцца ў электронным выглядзе і працягваецца да 17 студзеня. Місія з’яўляецца ўнікальнай магчымасцю прасоўвання дзейнасці падляшскіх кампаній на японскім рынку. Паездка прысвечана мікра-, малым і сярэднім прадпрымальнікам з Падляшскага ваяводства, якія зацікаўлены ў наладжванні міжнародных кантактаў і развіцці дзелавога супрацоўніцтва ў Японіі.
Місія запланавана на 17-23 траўня 2025 года і пройдзе ў горадзе Асака.
Беларускае Радыё Рацыя
