Чатыры аўтазапраўкі пад брэндам кампаніі “Трайпл”, якая належыць Юрыю Чыжу, выставілі на аўкцыён. Таргі адбудуцца на сайце пляцоўкі “Белрэалізацыя”. Адна запраўка размяшчаецца ў Бярозе, другая — у Менску, яшчэ дзве аўтазапраўкі – у Івацэвіцкім раёне.
Юрый Чыж лічыўся галоўным “кашальком” Лукашэнкі. Але ў другой палове 2010-х гадоў ён трапіў у няміласць. Яго былы партнёр Уладзімір Япрынцаў падаў заяву, пасля якой на Чыжа пачалі крымінальную справу. У лютым 2023 года Чыжу прысудзілі 3,5 года за махлярства і легалізацыю злачынных даходаў. Але да яго ўжылі амністыю і ўлічылі час, праведзены пад вартай да суда. Сёлета ў жніўні паведамлялася, што Чыж цалкам вярнуў кантроль над кампаніяй “Трайпл”. (euroradio.fm)
Літоўская мытня ўзмацняе кантроль на мяжы з Беларуссю
Ад 11 лістапада мытня Літвы ўводзіць больш строгі кантроль на мяжы за вывазам з Еўразвязу тавараў падвойнага прызначэння. У канцы верасня Літва прыняла рашэнне дэнансаваць пагадненне аб супрацоўніцтве з Беларуссю ў мытнай сферы. Як паведамляецца на сайце літоўскага ведамства, пад узмоцнены кантроль трапяць пераважна фірмы-экспарцёры, а не звычайныя грамадзяне.
Таварамі падвойнага прызначэння лічацца тыя, што могуць выкарыстоўвацца для ваенных дзеянняў ці для вытворчасці прадметаў, якія выкарыстоўваюцца ў ваенных мэтах. Асаблівую ўвагу літоўскія мытнікі будуць надаваць электроніцы — чыпам, мікрасхемам ды іншым электронным кампанентам. Таксама будзе больш строгі кантроль над экспартам такіх тавараў, як медыка-дыягнастычнае абсталяванне, розныя механізмы, іх дэталі і аналагічныя тавары, – гаворыцца ў паведамленні. (polskieradio.pl)
Экспарт Кітая рвануў уверх на фоне выбараў у ЗША
У кастрычніку экспарт Кітая паказаў самы хуткі рост за апошнія два гады. Гэта адбылося, бо Кітай чакае, што ЗША і Еўразвяз неўзабаве павысяць тарыфы на ўвоз кітайскіх тавараў.
Дональд Трамп раней абяцаў у выпадку сваёй перамогі на прэзідэнцкіх выбарах у ЗША павысіць тарыфы на кітайскі імпарт больш як на 60%. Гэта палохае кітайскіх уладальнікаў заводаў і чыноўнікаў, паколькі штогадовыя пастаўкі з Кітая ў ЗША складаюць каля 500 мільярдаў даляраў. Еўразвяз у мінулым годзе закупіў кітайскіх тавараў на 466 мільярдаў даляраў.
Агулам Кітай павялічыў у кастрычніку экспарт тавараў на 12,7% у гадавым вымярэнні, што перавышае прагназаваны рост на 5,2%. Паводле даных кітайскай мытні, летась асноўнымі таварамі, якія Кітай пастаўляў у Штаты, былі смартфоны, планшэты і гульнявыя прыстаўкі. (Наша Ніва паводле Reuters)
Беларускае Радыё Рацыя
