Сельскагаспадарчым арганізацыям дазволілі прадаваць пустуючыя жылыя дамы на аўкцыёнах са значнай зніжкай, а калі пакупнікоў не знойдзецца — аддаваць іх усяго за адну базавую велічыню. Гэта прадугледжана ўказам №392 «Аб удасканаленні парадку продажу сельскагаспадарчымі арганізацыямі жылых памяшканняў», які сёння, 10 лістапада, падпісаў Аляксандр Лукашэнка.
Фота: Вадзім Манько.
Як паведамляе прэс-служба Лукашэнкі, дакумент накіраваны на актывізацыю выкарыстання пустуючых і незаселеных дамоў, што знаходзяцца на балансе сельгаспрадпрыемстваў, у тым ліку пабудаваных з дзяржаўнай падтрымкай.
Паводле новага парадку, уладальнікі пустога жылля змогуць паніжаць яго пачатковы кошт на 50% пры правядзенні паўторных таргоў і на 80% — пры наступных. Цяпер жа цана зніжаецца толькі на 10% на кожных наступных таргах.
Калі нават пасля зніжэння на 80% жылое памяшканне не будзе прададзена, яго дазволяць рэалізаваць за адну базавую велічыню.
Канкрэтны памер зніжэння пачатковай цаны і магчымасць продажу дамоў за адну базавую будуць вызначацца са згоды мясцовых выканкамаў.
Указ уступае ў сілу пасля яго афіцыйнага апублікавання.
