Каментуючы для беларускага дзяржаўнага тэлебачання вынікі перамоваў з амерыканскай дэлегацыяй у Менску, пастаянны прадстаўнік Беларусі пры ААН і адзін з ключавых перамоўшчыкаў Валянцін Рыбаков растлумачыў, што ўлады маюць на ўвазе пад нармалізацыяй адносінаў паміж Беларуссю і ЗША.
Рыбаков спаслаўся на словы спецпрадстаўніка прэзідэнта ЗША Джона Коўла і намякнуў на магчымасць развіцця сумеснага бізнесу з амерыканскім бокам.
Паводле яго слоў, амерыканскі спецпрадстаўнік падчас сустрэчы з Аляксандрам Лукашэнкам адкрыта заявіў, што канчатковай мэтай адміністрацыі ЗША з’яўляецца поўная нармалізацыя беларуска-амерыканскіх адносінаў.
«У гэта паняцце ўваходзіць абсалютна ўсё: палітычныя адносіны, эканамічныя адносіны, бізнес, які мы можам сумесна развіваць і якім можам разам займацца. Гэта культура — увесь комплекс нашых узаемаадносінаў. Гэта не проста агульная фармулёўка пра “ўвесь комплекс двухбаковых адносінаў”, а сапраўды ўсё без выключэння», — заявіў Рыбаков.
