Кампанія Stadler паставіць Беларускай чыгунцы цягнікі для міжрэгіянальных ліній. Пра гэта расказаў першы намеснік начальніка Беларускай чыгункі Аляксандр Харашэвіч. Прадстаўнік БЧ удакладніў, што вырабляць тэхніку будуць у Беларусі.
Як нагадвае Office Life, у швейцарскай кампаніі Stadler застаўся актыў у Беларусі. Гаворка ідзе пра завод «Штадлер Менск», уласнікам якога на 100 працэнтаў з’яўляецца надалей Stadler. У 2014 годзе кампанія запусціла пад Менскам, у Фаніпалі, вытворчасць рухомых саставаў для чыгунак і метро.
Аляксандр Харашэвіч удакладніў, што па кантракце для БЧ павінны паставіць 65 цягнікоў, у тым ліку 30 электрацягнікоў і 35 дызель-цягнікоў.
У Варшаве пройдзе канферэнцыя беларускага тэхналагічнага бізнесу
6 верасня ў Варшаве адбудзецца канферэнцыя BelTech Global 3.0 – найбуйнейшая падзея беларускага тэхналагічнага бізнесу за мяжой.
Яе арганізатары на чале з ZPP/Belarus Business Center збіраюць на мерапрыемства 50 спікераў, каля 400 гасцей, 11 партнёраў і 5 інфапартнёраў, якія ў рамках выступленняў і панэльных дыскусій абмяркуюць бягучы стан і перспектывы развіцця галіны.
Сярод самых вядомых спікераў BelTech Global 3.0 – кіраўнік і сузаснавальнік Flo Health Дзмітрый Гурскі, заснавальнік венчурнага фонду Flyer One Ventures Віталь Лапцёнак, кіруючы партнёр Zubr Capital Канстанцін Запалянскі, адзін з топ-мэнэджараў AIBY Раман Альшэўскі і іншыя зоркі беларускага і глабальнага IT і хардвера.
У Еўропе рэвалюцыйныя змены ў манікюры
З 1 верасня ў Еўрапейскім саюзе будзе забаронена выкарыстанне аксіду трыметылбензаілу дыфенілфасфіну. Гэта TPO – рэчыва, якое паўсюдна выкарыстоўваецца ў якасці фотаініцыятара для зацвярдзення геляў пад уздзеяннем ультрафіялетавага святла, у тым ліку геляў для нарошчвання і мадэлявання пазногцяў.
З гэтага моманту салоны прыгажосці, спецыялісты і вытворцы на ўсёй тэрыторыі ЕС абавязаны забяспечыць, каб ніводны касметычны прадукт больш не ўтрымліваў TPO. Акрамя таго, усе рэшткі павінны быць утылізаваны, незалежна ад таго, калі яны былі набыты.
У 2023 годзе Еўрапейская камісія перакласіфікавала TPO як рэчыва катэгорыі 1B, якое валодае канцэрагеннымі, мутагеннымі або таксічнымі уласцівасцямі, піша “Беларусы і рынак”.
Беларускае Радыё Рацыя
Фота: OL.
