Аляксандр Лукашэнка падпісаў шэраг новых законаў. Адзін з іх — Закон «Аб змене законаў па пытаннях занятасці насельніцтва».
Новы закон узмацняе патрабаванні да прызначэння і атрымання дапамогі па беспрацоўі. Як паведамляе прэс-служба Лукашэнкі, «у мэтах выключэння ўтрыманскіх настрояў».
Дапамога будзе прызначацца пры выкананні пэўных умоў:
- неабходна зарэгістравацца ў службе занятасці цягам месяца з даты звальнення;
- не менш як пяць гадоў да рэгістрацыі беспрацоўным знаходзіцца ў працоўных адносінах з выплатай узносаў у Фонд сацыяльнай абароны насельніцтва.
“Максімальны перыяд знаходжання на ўліку ў службе занятасці скарачаецца з 18 да 12 месяцаў, перыяд выплаты дапамогі па беспрацоўі змяншаецца ўдвая – з 6 да 3 месяцаў”, – гаворыцца ў паведамленні.
Таксама дакументам прадугледжана пашырэнне пераліку катэгорый беспрацоўных, якім даюцца дадатковыя гарантыі занятасці.
Максімальны памер дапамогі па беспрацоўі — дзве базавыя велічыні, што зараз складае 80 рублёў.
Беларускае Радыё Рацыя
