Ад развязкі ў Кузніцы да вузла Саколка-Пулноц адкрылі для руху новы ўчастак польскай хуткаснай магістралі S19, якую будуюць да мяжы з Беларуссю, да пункта пропуску “Кузніца — Брузгі”. Як піша «АвтоГродно», будаўніцтва адрэзка ад самога памежнага пераходу да развязкі ў Кузніцы плануецца завяршыць у бліжэйшыя месяцы.
Працягласць новага ўчастка – 9,3 км. На яго ўзвядзенне выдзелілі 526,2 млн. злотых, або каля $146,5 млн.
Ніякіх зрухаў па вяртанні літоўскіх фур з Беларусі няма
Літоўская Нацыянальная асацыяцыя аўтаперавозчыкаў LINAVA рыхтуе калектыўны пазоў да ўрада сваёй краіны з-за фур, якія затрымаліся на тэрыторыі Беларусі, заявіў яе кіраўнік Эрландас Мікенас.
“Ніякіх зрухаў, што тычыцца вяртання фур, у нас няма. Няма ніякіх навін ні з Беларусі, ні з боку ўрада“, — цытуе яго Delfi. “Пры садзейнічанні адвакатаў мы звернемся да ўрада, — сказаў Мікенас. Што тычыцца колькасці літоўскіх фур, то гаворка ідзе аб прыкладна сотні аўтамабіляў.
У Менску назвалі найбольш запатрабаваныя
Сталічныя ўлады апублікавалі барометр занятасці на 2026 год, які паказвае, якія прафесіі будуць найбольш запатрабаваны ў Менску.
Сярод рабочых спецыяльнасцей найбольшым попытам будуць карыстацца вадзіцелі аўтамабіляў, муляры, маляры, тынкоўшчыкі, мантажнікі сантэхсістэм і будаўнічых канструкцый, наладчыкі станкоў з праграмным кіраваннем. Таксама ў спісе запатрабаваных прафесій – афіцыянты, бармэны, кухары, кандытары, прадаўцы і слесары розных напрамкаў.
Сярод служачых на рынку працы найбольш запатрабаванымі будуць бухгалтары, урачы, выхавальнікі, інжынеры і маркетолагі. Таксама застануцца актуальнымі медсёстры, менеджэры па продажах і педагогі.
Стала вядома, якую пенсію атрымлівае Байдэн
Былы прэзідэнт ЗША Джо Байдэн пайшоў у адстаўку з самай высокай дзяржаўнай пенсіяй у гісторыі амерыканскіх экс-прэзідэнтаў. Ён атрымлівае $417 тыс. у год, піша New York Post. Характэрна, што пенсія Байдэна перавысіла яго прэзідэнцкую зарплату. На пасадзе кіраўніка дзяржавы ён атрымліваў $400 тыс. у год.
83-гадовы Байдэн атрымлівае такія выплаты дзякуючы доўгай кар’еры ў палітыцы. Сумарна ён прапрацаваў у Сенаце і на пасадзе віцэ-прэзідэнта 44 гады, у выніку атрымлівае выплаты адразу з некалькіх крыніц.
Беларускае Радыё Рацыя
Фота: abw.by.
