Урад Літвы зацвердзіў падрыхтаваны Міністэрствам сельскай гаспадаркі краіны пералік сельскагаспадарчай прадукцыі і кармоў расейскага і беларускага паходжання, увоз якіх забаранілі з трэцяга чэрвеня.
У пераліку, падрыхтаваным з улікам колькасці, структуры і кошту імпарту сельскагаспадарчай прадукцыі і кармоў, вызначаныя 24 групы прадукцыі, у тым ліку жывая жывёла, мяса і субпрадукты, рыба, малако і прадукты яго перапрацоўкі, яйкі, натуральны мёд, збожжа, крупы, алей, напоі, тытунь і іншыя прадукты. У той жа час у паведамленні ўраду Літвы адзначаецца, што «сельскагаспадарчую прадукцыю, якая не мае альтэрнатыўных крыніц імпарту (некаторыя грыбы, ягады, некаторыя віды кармоў для жывёлы і іншыя), не ўключылі ў пералік».
У сакавіку Літва разам з Латвіяй, Эстоніяй, Польшчай і Чэхіяй заклікала Еўракамісію прааналізаваць магчымасць абмежавання імпарту ў ЕЗ прадуктаў харчавання, якія паходзяць з Беларусі і Расеі.
Беларускае Радыё Рацыя
