Дванаццаць гадоў таму – 22 студзеня 2014 года – падчас сутыкненняў на вуліцы Грушэўскага ў Кіеве быў смяротна паранены Міхась Жызнеўскі — грамадзянін Беларусі, удзельнік Еўрамайдану. Ён атрымаў агнястрэльнае раненне і загінуў на месцы. Жызнеўскі стаў адным з першых забітых пратэстоўцаў падчас Рэвалюцыі годнасці.
Штогод беларусы, якія жывуць у Кіеве, арганізоўваюць мітынг памяці ў гонар загінулага героя. Сёлета Марш пройдзе 26 студзеня, не ў гадавіну смерці, а ў дзень народзінаў Міхася Жызнеўскага, кажа Ірына Лукашэнка, беларуска, якая жыве ў Кіеве:
-Кожны год мы выходзім Маршам і такім чынам паказваем, дзе зараз беларусы і што яны робяць для Украіны. Маршрут руху кожны год нязменны: такім маршрутам у 2014 годзе праводзілі ў апошні шлях Міхася Жызнеўскага.
Ва Украіне смерць Жызнеўскага стала сімвалам міжнароднай салідарнасці і ўдзелу беларусаў у змаганні за свабоду. Пасмяротна Міхась Жызнеўскі быў узнагароджаны ордэнам Герояў Нябеснай Сотні, а ў 2017 годзе яму было прысвоена званне Герой Украіны з уручэннем ордэна «Залатая Зорка».
Цалкам гутарка:
Беларускае Радыё Рацыя
