У цэнтры Беластока, насупраць помніка Юзэфу Пілсудскаму, прайшла акцыя беларускай дыяспары «Разам супраць расейскай агрэсіі» на знак салідарнасці з Украінай да чацвёртых угодкаў поўнамаштабнай вайны.
Да ўдзельнікаў звярнулася намесніца Прэзідэнта горада Беластока Эліза Агнешка Цыбулька:
– Сустрэліся мы тут разам – беластачанкі і беластачане, украінкі і ўкраінцы, беларусы і беларускі – каб запратэставаць супраць вайны, якая працягваецца ўжо чатыры гады. З пачатку вайны мы падтрымліваем украінскі народ.
Каля 300 чалавек — украінцы, беларусы і палякі — сабраліся разам, каб ушанаваць ахвяраў вайны і выказаць падтрымку ўкраінскаму народу. Луналі ўкраінскія і бел-чырвона-белыя сцягі.
Кажуць удзельнікі мітынгу:
– Мы вялікая сям’я з Херсону. Цяжка нам. Дзіця кажа: мама, напішы, я хачу дамоў. Цяжка даецца інтэграцыя.
– Чацвёрты год вайны, вайны за існаванне. І чацвёрты год болю, нязломнасці, мужнасці.
– Прыйшоў сюды, каб паказаць, што ў кожным горадзе ў Польшчы ёсць такія, як я, якія стараюцца дапамагаць як могуць.
– Я асабіста з горада Сумы. У нас кожны дзень прылёты, кожны дзень смерці. Гэта не толькі ў Сумах, гэта па ўсёй Украіне. І хочацца, каб людзі пачулі.
– Беларусы не згодныя. І беларусы гатовыя далей змагацца. Лёс Беларусі вырашаецца на палях Украіны.
– Дзякуй беларусам за тое, што арганізоўваюць такія акцыі і нас падцягваюць.
Падчас акцыі прагучалі словы падтрымкі і для Ічкерыі — народа, які таксама доўгія гады змагаецца з расейскай агрэсіяй.
Пасля завяршэння мітынгу ўдзельнікі яшчэ доўга не разыходзіліся: разам заспявалі гімн Украіны, падкрэсліваючы, што салідарнасць працягваецца і па-за межамі самой акцыі.
Цалкам матэрыял:
Арганізатар акцыі Ян Абадоўскі распавёў пра важнасць акцыі не толькі для ўкраінцаў, але і беларусаў, падзякаваў прысутным палякам, якія таксама прыйшлі падтрымаць мітынг.
Калі Украіна падзе ў вайне, то расейская агрэсія можа перамясціцца і ў Польшчу. Заклік да салідарнасці, якая ніколі не скончыцца.
Расповед пра ініцыятыву маскіравальных сетак Беластока, заклік далучацца. Слова бярэ прадстаўнік украінскай дыяспары Антон Галавач.
Узгадваецца салідарнасць і з рэспублікай Ічкерыя, якая зведвае такія ж праблемы з Расеяй. Усе чакаюць, калі скончыцца вайна, каб пачаць аднаўляць Украіну. Зараз вайна, гэта не толькі барацьба і боль, але і чаканне людзей з палону, чаканне дэмакратычных зменаў.
Прадстаўніцы ўкраінскай дыяспары распавядаюць пра ўмовы, у якіх Украіна сустракае чарговы год вайны.
На мітынгу сабралася каля 300 чалавек.
Слова ўзяла Эліза Цыбулька, прадстаўніца ўладаў горада Беластока
Пасля заканчэння акцыі, удзельнікі доўга не разыходзіліся, яны заспявалі гімн Украіны.
* * *
Беларускае Радыё Рацыя, Беласток
