Моладзевая арганізацыя “ІншыЯ” правяла даследаванне “Ацэнка псіхалагічнага стану беларускіх актывістаў(ак), якія выехалі”. Даследаванне праводзілася пры падтрымцы гендарнай даследчыцы Алены Агарэлышавай.
Наша карэспандэнтка Вольга Сямашка пагутарыла з аўтаркай даследавання Аленай Агарэлышавай пра тое, якім чынам праводзілася даследавання, якія вынікі былі атрыманая і што можна зрабіць, каб палегчыць становішча беларускіх актывістаў у выгнанні:
РР: Якая была мэта гэтага даследавання?
Алена Агарэлышава: Гэта была інтэрнэт-апытанка, больш за 60 чалавек прынялі ўдзел. Гэта супрацоўнікі і супрацоўніцы грамадскага сектару, з асноўным фокусам на Беларусь. Гэта людзі, якія на дадзены момант жывуць у Грузіі, Польшчы і Літве. Ёсць прадстаўнікі і прадстаўніцы, якія жывуць у іншых краінах. То бок наш асноўны фокус – гэта людзі, якія так ці інакш звязаныя з грамадскім сектарам, там працуюць ці валанцёраць. Таксама гэта людзі, якія зараз знаходзяцца за межамі Беларусі.
РР: Чаму, напрыклад, не было зроблена даследаванне па стане актывістак у выгнанні?
Алена Агарэлышава: Не было мэты зрабіць даследаванне толькі актывістак ці толькі актывістаў. Рабілі гэтую інтэрнэт-апытанку, распаўсюджвалі інфармацыю паўсюль. І ўжо так сталася, што ў нас атрымалася такая выбарка. Складана насамрэч сказаць, ці гэта значыцца, што грамадскі беларускі сектар мае выразна жаночы твар, можа быць тое і тое. Ці ў нас жанчыны больш прымаюць удзел у даследаванні, бо яны больш актыўныя ў плане апытанняў, у тым ліку псіхалагічных апытанняў. Бо гэта пра дэпрэсію, стрэс, не самыя лёгкія пытанні. Каб казаць, што гэта толькі пра грамадскі сектар, толькі пра жанчын, трэба было б правесці больш глыбокае даследаванне, больш людзей трэба было б апытаць. Але зноў такі ж у якасці такога першага задзелу, каб падумаць, а што з гэтым рабіць далей. Можа мы захочам яго паўтарыць праз некалькі гадоў, каб паглядзець, якія ёсць трэнды, як складалася сітуацыя, гэта было б цікава. Наступным разам мы напэўна бралі б шырэйшую выбарку.
Поўную гутарку слухайце ў далучаным гукавым файле:
Беларускае Радыё Рацыя
