“Алесь Бяляцкі: масты і сцены” – выстава ў гонар беларускага палітзняволенага і Нобелеўскага лаўрэата Алеся Бяляцкага адкрылася ў Сейме Літвы 25 верасня. У гэты дзень, 25 верасня 1962 года нарадзіўся вядомы праваабаронца, свае 63 гады ён будзе сустракаць у турме ў Беларусі.
Выставу арганізавалі апарат спікера Сейму Юозаса Олекаса, Офіс Святланы Ціханоўскай, праваабарончы цэнтар «Вясна» і цэнтар «Еўрапейскі дыялог».
Адкрыў выставу спікер Літоўскага Сейма Юозас Олекас, які назваў Алеся Бяляцкага “зоркай на небасхіле Беларусі” і адзначыў вялікую ролю “Вясны” ў абароне правоў чалавека.
А ад офіса Святланы Ціханоўскай выступіў яе дарадца Аляксандр Дабравольскі:
-Алеся Бяляцкага я ведаю вельмі даўно з канца 80-х гадоў мінулага стагоддзя, як дзеяча, які заўсёды змагаўся за Беларусь і за справядлівасць. І гэтая выстава паказвае, што ён выкарыстоўваў усе магчымасці, каб падняць пытанне Беларусі, беларусаў і правоў чалавека на міжнародны ровень.
Пра Алеся Бяляцкага на адкрыцці выставы выказаўся і яго калега з праваабрончага цэнтра “Вясна” Канстанцін Старадубец.
Ён зазначыў, што, па звестках “Вясны”, у Алеся пагоршылася здароўе і ён быў у лякарні:
-Нядаўна мы праз вязня, які вызваліўся, даведаліся, што Алесь нібыта быў у лякарні. Але мы і так ведалі, што ў яго праблемы са здароўем.
РР: Ці праўда, што ў яго была аперацыя?
-Гэта ўсё са слоў таго ж былога вязня. Мы не можам дакладна пацвердзіць.
На выставе “Алесь Бяляцкі: масты і сцены” было прадстаўлена больш за 30 фотаздымкаў Алеся Бяляцкага з сустрэч з сусветнымі палітыкамі і праваабаронцамі. Выстава будзе працаваць у Сейме Літвы да 9 кастрычніка.
Цалкам матэрыял:
Беларускае Радыё Рацыя
