Пра меры бяспекі “пры атацы дронаў” распавяла прэс-служба Гомельэнерга.
Сярод іншага ў тэксце ёсць такія «каштоўныя» парады, як «упасці на зямлю і локці прыціснуць да цела», скокнуць у траншэю ці канаву, «заставацца на зямлі, пакуль не спыняцца выбухі», а таксама «спыніце машыну, выберыцеся з яе і размясціцеся на зямлі, каб мінімізаваць рызыку пашкоджанняў». Падкрэсліваецца, што ўвагу на інфармацыю неабходна звярнуць жыхарам прыгранічных раёнаў краіны.
Варта адзначыць, што адзін і той самы тэкст публікуецца ў розных праўладных тэлеграм-каналах. Прычым робіцца гэта практычна адначасова, што можа казаць пра спланаваную інфармацыйна-прапагандысцкую акцыю. Падобныя парады, відаць, з’явіліся на фоне таго, што раней Аляксандр Лукашэнка заявіў аб перасячэнні дзяржаўнай мяжы ўкраінскімі дронамі, якія пасля нібыта збілі вайскоўцы.
У сваю чаргу маніторынгавая група “Беларускі Гаюн” паведаміла, што “ніякіх Дронов (БПЛА) знойдзена не было”.
Беларускае Радыё Рацыя
