Беларуска Дар’я Каспаровіч з Бельгіі падарыла палку Каліноўскага машыну. Дзяўчына збірала грошы на вакацыі, але вырашыла, што машына для нашых ваяроў важнейшая, кажа Дар’я Каспаровіч:
РР: Вы падарылі бус для каліноўцаў. Чаму вы вырашылі дапамагчы палку Каліноўскага?
— Я лічу, як беларуска, я нарадзілася ў Беларусі, я павінна дапамагаць беларусам. І паколькі я дапамагаю палку Каліноўскага, калі Украіна пераможа, гэта будзе добра для Беларусі, ці не так?
РР: Вы прыехалі спецыяльна, таму што вы падарылі бус і ехалі сюды?
— Так, гэта праўда, каб прывезці яго сюды.
РР: А ва Украіну вы яго не пагоніце? Толькі сюды?
— Не, гэта будуць рабіць людзі з палка Каліноўскага, якія паедуць ва Украіну.
РР: Далей будзеце ўдзельнічаць у дапамозе каліноўцам?
— Вядома. Мы спыталіся ў іх, што вам яшчэ трэба, і яны далі нам аркуш, то-то-то, і будзем спрабаваць гэта ажыццяўляць.
РР: Скажыце, вы даўно жывяце ў Бельгіі?
— Я жыву ў Бельгіі ўжо больш за 15 гадоў.
РР: З бацькамі?
— З бацькамі, так.
РР: Радзіму, бачу, не забылі.
— Не, вядома, не.
РР: Цягне?
— Ёсць такое, ёсць.
РР: А чаму бацькі выехалі ў свой час з Беларусі? Тады яшчэ, 15 гадоў таму, можа яшчэ не было так небяспечна, як цяпер.
— У іх былі свае праблемы, але тады, на той момант, яны не ўцягвалі мяне ў гэта. Я была дзіцём, і яны неяк не краналі гэтага.
РР: Вы і студэнтка. Ці працуеце вы?
— Я цяпер вучуся на юрыдычным курсе. Заканчваю магістратуру.
РР: Наколькі цяжка беларусам прыжывацца ў іншай краіне?
— Паколькі я там ужо з 10 гадоў, мне было лёгка. Але я думаю, людзям, якія, напрыклад, пераязджаюць пасля 20 гадоў, цяжка. Таму што Бельгія — гэта не Беларусь. Зусім іншае. Іншая культура, іншае разуменне, як жыць. Бельгія — гэта свабодная краіна, а Беларусь — не. На жаль.
РР: А вы ездзілі, пасля таго, як бацькі пераехалі, на канікулы, можа быць? Ці будучы студэнткай, ездзілі ўжо там да бабулі, дзядулі, радні?
— Была два разы на вельмі кароткі час. Бачыла бабуль, цётку, дзядзьку. Пабывала там. І я з Астраўца, для мяне гэта засталася вёска. Агародзік, лес. Гэта вельмі класна проста. Такога ў Бельгіі няма ў нас.
Цалкам размову слухайце ў далучаным гукавым файле:
Паводле Дар´і Каспаровіч, яна працягне займацца і надалей аказаннем дапамогі каліноўцам.
Беларускае Радыё Рацыя
