Беларускія абітурыенты Ягелонскага ўніверсітэта ў Кракаве просяць адміністрацыю ўстановы перагледзець патрабаванні да тэрмінаў настрыфікацыі дакументаў. Гаворка ідзе як мінімум пра два дзясяткі маладых людзей. Абітурыенты разам з роднымі стварылі адмысловую петыцыю да кіраўніцтва Ягелонскага ўніверсітэта.
У траўні Міністэрства адукацыі Беларусі адмовілася выдаваць беларускім абітурыентам даведкі, якія пацвярджаюць сапраўднасць атэстатаў для замежных ВНУ. Пацверджанне заканчэння школы ў Беларусі можна атрымаць у Польшчы праз працэдуру настрыфікацыі. Дакументы выдаюцца ўстановай Kuratorium Oświaty. Але справа ў тым, што візы беларускім студэнтам польскія ўстановы выдаюць за два тыдні да навучальнага года, а на працэс настрыфікацыі трэба ад 1,5 да 3 месяцаў. І беларускія навучэнцы проста не паспеюць гэтага зрабіць.
Беларускае Радыё Рацыя
