Беларуская дыяспара Бельгіі ладзіць традыцыйны збор на дапамогу беларускім ваярам Палка імя Кастуся Каліноўскага, які будзе прымеркаваны да Дня беларускай вайсковай славы 8 верасня. Але пры гэтым заклікае далучыцца да ініцыятывы ўсе дыяспары беларусаў, што прыжываюць за мяжою.
Гаворыць ініцыятар кампаніі Зміцер Піменаў з бельгійскага Антвэрпена.
– Пасля таго, як пачалася вайна, мы вырашылі адзначаць гэта свята (Дзень беларускай вайсковай славы) зборам на падарункі нашым ваярам “каліноўцам”. Дужа хацелася, я неаднаразова заклікаў, каб гэта традыцыя была не толькі ад Бельгіі, а ад усіх беларусаў у эміграцыі – і Амерыкі, і Канады, і краін Еўропы. Каб “каліноўцы” адчувалі, што іх ахвяра вельмі важная для беларусаў, якія знаходзяцца далёка ад Радзімы.
Разам з тым Зміцер адзначае, што з кожным годам такі збор ідзе ўсё складаней. На што, па яго словах, ёсць шэраг прычынаў.
– На сёння я больш займаюся пошукам не сродкаў, а пошукам тых слоў, якімі можна дастукацца да душы беларусаў. Гэта дапамога патрэбная ў першую чаргу для іх саміх. Людзі павінны зразумець, што гэты данат свет не зменіць, але самае галоўнае – гэты данат зможа вылекаваць душу чалавека.
Але пры гэтым збор трывае, як і тыя, што ў планах за ім. На дадзены момант ужо сабрана больш за 30 кілаграмаў патрэбных ваярам рэчаў і больш за тысячу еўра на закупку неабходнага на фронце рыштунку.
Для тых, хто захоча далучыцца да гэтай ініцыятывы, усе неабходныя рэквізіты будуць размешчаныя на сайце нашага радыё.
Цалкам матэрыл:
Кантакт: https://www.facebook.com/dzimitriy.pimenau
Грашовы перавод пазначаць: Help Ukraina.
Юрась Дзяшук, Беларускае Радыё Рацыя
