Былога “каліноўца” Васіля Верамейчыка прапаноўваюць абмяняць на іншага беларуса.
Гаворка ідзе аб прапанове дэлегатаў фракцыі «Беларусы» паставіць на галасаванне Каардынацыйнай рады пытанне пра зварот да ўладаў Украіны з мэтай абмяняць Васіля Верамейчыка на беларуса Дзмітрыя Ананчыка. Вядома, што апошні падпісаў кантракт з расейскім войскам і трапіў ва ўкраінскі палон у снежні мінулага года. У інтэрв’ю ўкраінскім медыям ён прасіў, каб яго лёсам заняліся ўлады Беларусі.
«Мы лічым, што гэтыя абставіны стварылі ўнікальную магчымасць для абмену беларускімі ваеннапалоннымі. З нашага боку кандыдатам для такога абмену можа быць Васіль Верамейчык. Баявы афіцэр, які ваяваў за Украіну ў 2022-м, атрымаў раненне і дзяржаўную ўзнагароду Украіны…», – цытуе «Позірк» зварот фракцыі.
Нагадаем, Васіль Верамейчык быў затрыманы ў лістападзе ў В“етнаме і дэпартаваны ў Беларусь.
Беларускае Радыё Рацыя
