Былы палітвязень Віктар Лосік, які адседзеў у засценках дыктатара больш за 4 гады, вымушаны быў пакінуць Беларусь як і многія іншыя палітзняволеныя. Зараз ён у бяспецы і гатовы, як Госць Беларускага Радыё Рацыя, падзяліцца з намі першымі перажытым.
РР: Прычына вашай эміграцыі?
Віктар Лосік: Прычына маёй эміграцыі, як і ў большасці палітвязняў боязь, што пасля адбыцця тэрміну зноў магу “заехаць”. І ў маім выпадку, калі я з’ехаў, праз месяц прыйшлі да маіх бацькоў з ператрусам і новай крымінальнай справай на мяне. Таму ведаю, што зрабіў правільны крок.
РР: Вы ў Польшчу прыехалі з сям’ёй?
Віктар Лосік: Так, з сям’ёй.
РР: Колькі часу вы ўжо ў Польшчы?
Віктар Лосік: У Польшчы я ўжо амаль восем месяцаў.
РР: Падалі дакументы ўжо на атрыманне бежанства?
Віктар Лосік: Так, на міжнародную ахову падаў, але зараз працягваюць усім тэрмін разгляду спраў, таму мне таксама працягнулі да 15 месяцаў, і пакуль рашэння няма.
РР: Я гляджу на “Вясне”, што вы падтрымалі Віктара Бабарыку і нават увайшлі ў яго ініцыятыўную групу. Чаму?
Віктар Лосік: Па-першае, я сачыў за ім і бачыў яго дапамогу ў розных беларускіх культурніцкіх праектах, а пасля часта яго інтэрв’ю пачалі трапляцца. І яго погляды на эканамічнае развіццё краіны мне пасавалі. Я не разглядаў там з пункту гледжання прарасейскі, газпромаўскі, я бачыў яго рэальныя справы па захаванні беларускага мастацтва і сучасны погляд на эканоміку.
РР: А кім вы працавалі ў Беларусі?
Віктар Лосік: У Беларусі я доўгі час працаваў у ІТ-сферы ў дзяржаўным сектары, а пасля з 2016 года сышоў на фрыланс і працаваў інтэрнэт-маркетолагам.
РР: У чым вас абвінавацілі і затрымалі ў 2020 годзе?
Віктар Лосік: Абвінавацілі ў тым, што я павесіў пудзілы міністра МУС Кубракова і старшыні, яго намесніка маёй мясцовай выбарчай камісіі. І яшчэ ў пашкоджанні будынкаў у тым, што наносіў на іх “Пагоню”.
РР: А гэта было ці яны проста выдумалі, каб вас затрымаць?
Віктар Лосік: Быў даволі актыўны, арганізоўваў частку мерапрыемстваў, таму за мной даўно палявалі, выклікалі і позвамі, я не хадзіў туды, прыязджалі дадому. Гэта так, маіх рук справа. Але пасыл майго абвінавачвання быў такі, што гэта было зроблена з хуліганскіх намераў – гэта не так.
Цалкам гутарку слухайце ў далучаным файле:
Беларускае Радыё Рацыя
