Былы палітвязень Аляксандр Андрушкевіч, які трымаў сухую галадоўку каля амбасады ЗША ў Вільні, спыніў сваю акцыю. Ён патлумачыў такое рашэнне станам здароўя.
“Ноччу пачаліся не вельмі добрыя працэсы, а ранкам перасталі сагравацца ногі, чаго не было папярэднія дзве ночы”, — расказаў ён у гутарцы з “Еўрарадыё”.
Андрушкевіч выйшаў на адзіночны пікет 26 сакавіка. Падчас пікетавання беларус звяртаўся да амерыканскіх дыпламатаў, каб тыя неадкладна паспрыялі вызваленню Сцяпана Латыпава. Сваю акцыю ён пачаў пасля з’яўлення звестак, што Латыпаў у зняволенні ўжо трэці раз паспрабаваў скончыць жыццё самагубствам.
У сваю чаргу, Народная амбасада Беларусі ў Італіі абвесціла флэш-моб салідарнасці з палітвязнем Сцяпанам Латыпавым, таксама патрабуючы яго найхутчэйшага вызвалення.
