Вядома, што Ігару Шкетаву, адміністратару пабліка «Подслушано Глубокое», прысуджаны два гады «хіміі». Найверагодней, падобнае пакаранне і ў Рамана Васілевіча. Насупраць іхных прозвішчаў ў “пераліку асобаў, схільных да эсктрэмісцкай дзейнасці”, пазначана “судзімасць не пагашана”.
У канцы студзеня і пачатку лютага ў судзе Глыбоцкага раёна па тым жа артыкуле судзілі Дзмітрыя і Івана Піскуновічаў. Іх у “экстрэмісцкі пералік” уключылі ў мінулым месяцы. 25 лютага па тым самым артыкуле ў Глыбокім судзілі прадпрымальніка Сяргея Міхалевіча. 10 сакавіка судзілі Аляксандра Шэлепня,12 сакавіка запланаваны яшчэ адзін суд па ч.1 арт.342 КК (арганізацыя групавых дзеянняў, якія груба парушаюць грамадскі парадак, альбо актыўны ўдзел у такіх дзеяннях) – над Людмілай Пацэвіч. Яе, як і іншых фігурантаў падобных справаў, будзе судзіць суддзя Глыбоцкага райсуда Андрэй Тарасевіч.
Гэтыя суды – наступствы “хапуна”, які сілавікі наладзілі ў Глыбокім у верасні-кастрычніку мінулага года. Тады на заангажаваных Тэлеграм-каналах выклалі 4 відэаролікі з пакаяльнымі відэа глыбачан, якія прызнаваліся, што бралі ўдзел у пратэстах супраць вынікаў мінулых прэзідэнцкіх выбараў. Частку затрыманых асудзілі адразу па адміністрацыйных артыкулах, а частку перавезлі ў віцебскі СІЗА, прад’явіўшы ім крымінальныя абвінавачанні, паведамляе “Віцебская вясна”.
