За некалькі дзён удалося сабраць грошы на ўсталяванне помніка на магіле палітвязня Ігара Ледніка, які памёр у няволі на 64-м годзе жыцця.
Фонд салідарнасці BySol абвясціў збор 11 сакавіка. Неабходна было сабраць 2 тысячы еўра. Цяпер ужо на гэты збор пералічана 2015 еўра.
Ігар Леднік памёр 20 лютага ў Менскай раённай лякарні. Яго даставілі туды з бабруйскай калоніі №2, дзе ён адбываў пакаранне. У палітвязня была інваліднасць другой групы, ён меў праблемы з сэрцам.
За артыкул у партыйным часопісе БСДП “Пазіцыя” Ледніка абвінавацілі ў паклёпе на Лукашэнку і прысудзілі да трох гадоў калоніі агульнага рэжыму.
У Беларусі ў зняволенні памерлі найменш пяць палітычных вязняў.
