Беларускага журналіста і музыку Ігара Палынскага, які ўжо некалькі год жыве ў Беластоку, унеслі ў базу вышуку МУС Расеі.
Ігар пракаментаваў гэту навіну наступным чынам:
– Насамрэч мяне ўключылі ў расейскую базу вышуку даволі даўно. Можа год таму, можа больш. Зараз проста мае сябры заўважылі, што там з’явілася яшчэ і фотка з базы беларускіх пашпартоў. Таксама я звярнуў увагу, што кантактная інфармацыя, па якой пільныя грамадзяне, напрыклад, калі ведаюць пра маё месцазнаходжанне, то могуць звярнуцца па нумары тэлефона, ёсць там унізе, і гэта беларускія нумары тэлефонаў.
Па словах Ігара Палынскага, ён выпадкова таксама даведаўся і пра крымінальную справу, якую распачалі ў адносінах да яго:
– Я ўжо даўно перастаў шукаць логіку ў тым, што яны робяць, як яны займаюцца пераследам менавіта людзей, якія з’ехалі. Я ведаю пра тое, што на мяне ў Беларусі заведзена крымінальная справа, і даведаўся пра гэта абсалютна выпадкова. Калі мне пра гэта расказалі, я патэлефанаваў следчым у Маладэчна, бо менавіта маладэчанскія мной цікавяцца. Яны прапанавалі мне прыехаць з дакументамі да іх, каб яны пераканаліся, што гэта менавіта я, тады яны мне раскажуць, чаго яны ад мяне хочуць.
Нагадаем, што цягам апошняга тыдня ў расейскай базе вышуку сябе знайшлі беларускія журналісткі Таццяна Каравянкова і Глафіра Жук. Паспрабаваць знайсці сябе ў гэтай расейскай базе вышуку можна на сайце МУС РФ.
Цалкам матэрыял:
Беларускае Радыё Рацыя
