Улады Беларусі разглядаюць будаўніцтва пункта пахавання радыеактыўных адкідаў БелАЭС у Гомельскай вобласці – паблізу мяжы з Украінай. Гаворка ідзе пра вёску Навасёлкі Хойніцкага раёна, якая знаходзіцца за межамі Палескага дзяржаўнага радыяцыйна-экалагічнага запаведніка, але ўшчыльную да яго мяжы, паведамляе «Флагшток».
Інфармацыю аб канкрэтным месцы верагоднага будаўніцтва палігона для часовага захоўвання і ўтылізацыі радыеактыўных адходаў выданне «Флагшток» выявіла ў газеце Хойніцкага райвыканкама «Хойніцкія навіны». Дадзеныя ўтрымліваюцца ў справаздачы аб грамадскім абмеркаванні пад загалоўкам «Пытанне стратэгічнай важнасці – аб бяспечным заўтра».
Паводле публікацыі, гаворка ідзе пра вёску Навасёлкі, размешчаную прыкладна за сем кіламетраў ад Хойнікаў. Населены пункт не ўваходзіць у зону абавязковага адсялення, аднак фактычна вымер у апошнія гады.
Беларускае Радыё Рацыя
