23 красавіка стала вядома пра арышт каталіцкага ксяндза Сяргея Трысценя. Пра гэта паведаміла Хрысціянская візія. Але пазней з’явілася інфармацыя, што святар знаходзіцца дома.
Трысцень — настаяцель манаскай супольнасці кармелітаў босых у Менску, дырэктар Школы сямейнага жыцця, выкладчык Менскага тэалагічнага каледжа святога Яна Хрысціцеля. «На дадзены момант так і не ўдалося дакладна праверыць, што адбывалася са святаром [23 красавіка], але вядома, што святар знаходзіцца дома», — гаворыцца ў тэлеграм-канале «Хрысціянская візія».
Але дакладна вядома, што 23 красавіка евангельскага пастара з Хойніцкага раёна Алега Лойку затрымалі па крымінальнай справе, яго абвінавачваюць у перадачы інфармацыі аб перасоўванні расейскай вайсковай тэхнікі па тэрыторыі Беларусі.
