Каталікі 6 студзеня адзначылі Свята Трох Каралёў, якое завяршае перыяд Божага Нараджэння.
У Вільні трохметровыя фігуры каралёў Каспара, Мельхіёра і Бальтазара ў суправаджэнні анёла з зоркай і вялікага эскорту з жыхароў і гасцей літоўскай сталіцы прайшліся ад Вострай Брамы да Катэдральнай плошчы. У руках каралі неслі золата, ладан і міру – дары, якія згодна з Евангеллем, мудрацы прынеслі нованароджанаму Езусу Хрысту.
Калі працэсія дайшла да Катэдральнай плошчы, з каралямі сфатаграфаваліся ўсе жадаючыя. А пасля адбыўся святочны канцэрт “Джазавы востраў” ад спевакоў літоўскай джазавай школы.
У гэты дзень каталікі наведваюць касцёлы і падчас святочных літургій асвячаюць крэйду, ваду і золата. Крэйдай яны пішуць на дзвярах першыя літары імёнаў Трох Каралёў, чаргуючы крыжамі як сімвал блаславення хаты. Яшчэ гэтыя літары азначаюць выраз “Christus Mansionem Benedicat” – Хрыстос бласлаўляе памяшканне.
Беларускае Радыё Рацыя
