Фота: wikipedia.org
Сябрам пісьменніцы Святланы Алексіевіч атрымалася забраць з яе менскай кватэры нобелеўскі медаль. Сама кватэра, набытая за Нобелеўскую прэмію, знаходзіцца пад пагрозай канфіскацыі, паведаміла літаратар у інтэрв’ю нямецкаму штотыднёвіку Die Zeit.
Паводле яе слоў, у Менску засталіся дзённікі і ўсе рукапісы. Кватэра знаходзіцца ў т. зв. “доме Чыжа”, размешчаным у цэнтры горада на набярэжнай ракі Свіслач па суседстве з Траецкім прадмесцем.
“Цяпер прапагандысты гавораць: гэтая кватэра была б ідэальная для сям’і супрацоўніка АМАПа”, — адзначыла лаўрэат Нобелеўскай прэміі па літаратуры за 2015 год.
28 лістапада па Беларусі пракацілася хваля ператрусаў у тых, хто, на думку ўладаў, звязаны з Каардынацыйнай радай па выхадзе з палітычнага крызісу. Заведзена крымінальная справа, ужо другая, у дачыненні да КР. Алексіевіч уваходзіла ў прэзыдыюм першага складу КР у 2020 годзе, аднак публічна ўлады ў ліку фігурантаў першай справы яе не называлі.
