У гарадзенскай турме 12 клірыкаў адслужылі літургію, на якую не дапусцілі праваслаўных палітвязняў.
Архіепіскап Гродзенскі і Ваўкавыскі Антоній (Даронін) у канцэлебрацыі адзінаццаці святароў адслужыў літургію ў турме №1 Гародні. Набажэнства адбывалася ў межах мерапрыемстваў, прысвечаных 30-годдзю турэмнага служэння Беларускага Экзархату.
Як паведамляе @christianvision, на апублікаваных фотаздымках бачна, што на богаслужэнні прысутнічалі асуджаныя, аднак няма ніводнага з жоўтай біркай — адметным знакам асуджаных па палітычных артыкулах. Няма нават тых палітвязняў, пра якіх вядома, што яны з’яўляюцца праваслаўнымі вернікамі: менавіта ў турме №1 адбываюць тэрміны Мікалай Аўтуховіч, сын палітзняволенага святара Павел Рэзановіч, а таксама хрысціянскі публіцыст Павел Севярынец.
Вядома, што Павел Севярынец цягам многіх гадоў безвынікова дабіваецца сустрэчы са святаром і ўдзелу ў літургіі.
