На Падляшшы выратавальнікі атрымалі сёння, 16 снежня, больш за 380 выклікаў. Паламаныя дрэвы і галіны, перакрытыя дарогі, абарваныя лініі электраперадачы, пашкоджаныя дахі – вось некаторыя з наступстваў надвор’я ў панядзелак.
Без святла па стане на 14 гадзін былі 72 тысячы кліентаў – паведамілі ў арганізацыі PGE Dystrybucja ў Беластоку. Найгорш было ў Беластоцкім павеце, дзе аднаўленчыя працы яшчэ працягваюцца. Брыгады майстроў будуць працаваць да позняй ночы.
Беларускае Міністэрства па надзвычайных сітуацыях паведаміла, што на працягу дня было зафіксавана шмат выпадкаў падзення дрэў, у прыватнасці сем выпадкаў у Берасцейскай, і 17 у Гарадзенскай абласцях. Пашкоджаныя дахі 11-ці жылых дамоў. У вёсцы Воўчкі на Слонімшчыне разбураны будынак кароўніка.
Таксама ўпалі пяць навагодніх ялінак – тры ў Гародні, адна ў Калінкавічах і адна ў Заслаўлі. Пацярпелых няма, вядуцца аднаўленчыя працы.
Фота: mchs.gov.by
