У дачыненні да папулярызатара беларускай мовы Ігара Случака распачатая крымінальная справа. Пра гэта ён паведаміў на сваёй старонцы ў Instagram.
Яго абвінавачваюць у садзейнічанні экстрэмісцкай дзейнасці. З публікацыі Случака вынікае, што справа была заведзеная яшчэ 22 траўня 2024 года, а 24 снежня матэрыялы былі перададзеныя ў Рагачоўскі раённы аддзел Следчага камітэта. Гэта ў Гомельскай вобласці.
5 кастрычніка 2023 года стала вядома, што сям’я абаронцаў беларускай мовы Ігара Случака і Галіны Нагорнай вывезеная з Беларусі пры дапамозе Фонду салідарнасці BySol.
Нагорная ў лістападзе 2023 года была ўзнагароджана медалём ордэна «Пагоня» Рады БНР за заслугі ў барацьбе за свабоду і незалежнасць Беларусі.
