Некалькі павільёнаў сёння былі пашкоджаны агнём на рынку “Юбілейны” ў Берасці, паведамілі ў МНС Беларусі.
Рынак размешчаны на вуліцы Маскоўскай. Пасля атрымання паведамлення пра надзвычайнае здарэнне, на месца прыбылі ратавальнікі.
“Высветлілася, што гарэлі пяць гандлёвых павільёнаў, якія выкарыстоўваюцца для продажу нехарчовых тавараў”, – гаворыцца ў паведамленні ў Telegram-канале МНС.
Па інфармацыі ведамства, узгаранне было ліквідавана. “Пацярпелых няма. Прычына пажару высвятляецца”, – адзначылі там.
Варта нагадаць, што ў снежні мінулага года ў ГЦ “Беларусь” у Віцебску адбылося буйное ўзгаранне, з будынка гандлёвага цэнтра было эвакуявана 215 чалавек. У студзені гэтага года задымленне адбылося ў гандлёвым цэнтры “Сілуэт” у Менску.
