Нобелеўская прэмія па фізіцы 2024 года прысуджана Джону Гопфілду з Прынстанскага ўніверсітэту (ЗША) і Джэфры Гінтану з Універсітэту Таронта (Канада) “за фундаментальныя адкрыцці і вынаходкі, якія зрабілі магчымымі машыннае навучанне са штучнымі нейрасецямі”.
Лаўрэаты прэміі працавалі са штучнымі нейронавымі сеткамі з 1980-х гадоў.
Гопфілд стварыў асацыятыўную нейронавую сетку ў 1982 годзе. Яна атрымала ягонае імя.
Гінтан быў адным з даследчыкаў, якія прапанавалі выкарыстоўваць метад зваротнага распаўсюджвання памылкі для трэніроўкі шматслаёвай нейронавай сеткі. Разам з Тэры Сейноўскі вынайшаў «машыну Больцмана», якая стала развіццём сеткі Гопфілда.
