Арцыбіскуп Іньяцыё Чэфалія прыбыў у Беларусь у якасці новага Апостальскага нунцыя. 26 чэрвеня ў Менску ў яго адбылася першая сустрэча з беларускімі біскупамі, паведамляе Пінская дыяцэзія.
Сустрэча праходзіла ў рэзідэнцыі арцыбіскупа Юзафа Станеўскага. Падчас яе нунцый прадставіў дакумент Ватыкана аб сваім прызначэнні. Пінская Царква была прадстаўлена ўсімі трыма біскупамі — Антоніем Дзям’янкам, Андрэем Зноскам і Казімірам Велікасельцам.
Прысутныя падзяліліся з пасланнікам Папы досведам служэння і запрасілі яго на Палессе, дзе мясцовая дыяцэзія будзе адзначаць сваё стагоддзе.
