Яму былі прад’яўленыя абвінавачванні адразу па двух палітычна матываваных артыкулах Крымінальнага кодэкса Рэспублікі Беларусь.
Палітвязень Пётр Ярмашук быў затрыманы на падставе такіх артыкулаў як арт. 361-2 Крымінальнага кодэкса – Фінансаванне дзейнасці экстрэмісцкага фармавання і арт. 354 Крымінальнага кодэкса – Распрацоўка, выкарыстанне, распаўсюд або збыт шкоднасных камп’ютарных праграм.
Затрыманы ў сакавіку бягучага года першы раз на тры дні, а пасля паўторна ўзяты пад стражу ў чэрвені. Як вынікае з абвінавачвання, у сакавіку мінулага года мужчына запампаваў з сайта ItArmy of Ukraine некалькі файлаў, якія дазваляюць праводзіць DDoS-напады. Пасля гэтага «не менш за 8 разоў» запускаў на сваім кампутары праграму, па прычыне чаго «парушалася сістэма абароны ад DDoS-атак» і «была парушана праца неўстаноўленых інтэрнэт-рэсурсаў Расейскай Федэрацыі».
Да таго ж яму прадʼявілі ахвяраванні ў памеры 60 $ ініцыятыве BySOL, якая прызнаная беларускімі ўладамі «экстрэмісцкім фармаваннем». Пётр Ярмашук знаходзіцца зараз у СІЗА №7 горада Берасця.
Аліса Поль, Беларускае Радыё Рацыя.
