Трагедыя адбылася ў нядзелю, 23 чэрвеня. МЗС пра смерць Сідарэнкі паведаміла толькі 26 чэрвеня, без якіх-кольвечы падрабязнасцяў.
Як стала вядома «Нашай Ніве», былы пасол у Германіі Дзяніс Сідарэнка скончыў жыццё самагубствам — скокнуў з менскага шматпавярховіка.
Сідарэнка быў амбасадарам Беларусі ў Нямеччыне надзвычай доўга — з 2016 да 2024 года. Яго вызвалілі ад гэтай пасады ўказам Лукашэнкі 11 сакавіка гэтага года.
Пасля вяртання са сваёй пасольскай камандзіроўкі з Германіі, Сідарэнка стаў аб’ектам увагі Камітэта дзяржаўнай бяспекі.
«Не вылазіў з паліграфаў і допытаў», — расказалі інфармаваныя суразмоўцы.
Новай пасады ў Міністэрстве замежных спраў Сідарэнка не атрымаў. Хаця работа паслом у Германіі — найбольшай дзяржаве Еўразвяза, — гэта пасольская пасада вышэйшай лігі.
«Відаць, не вытрымаў таго, што адбываецца», — дадаў іншы інфармаваны суразмоўца.
У Сідарэнкі засталіся дзве дачкі.
