Звыш 400 дзён за кратамі правёў палітвязень з Берасцейшчыны Павал Петручэня. Ён у так званым спісе тэрарыстаў. Асуджаны па крымінальнай палітычна матываванай справе.
Палітвязню Паўлу Петручэні прад’яўленыя абвінавачванні па арт. 130 Крымінальнага кодэкса – Распальванне варожасці ці варажнечы. Падставай да завядзення справы стала перадача дадзеных у «Чорную кнігу Беларусі».
Да затрымання Павал Петручэня працаваў у сферы IT, у яго двое непаўнагадовых дзяцей. На пакаяльным відэа палітвязень распавёў, што працаваў у Дэпартаменце аховы да 2018 года, а затрыманы быў за перадачу асабістых звестак супрацоўнікаў Дэпартамента ў ЧКБ.
Прысуд – 6 гадоў пазбаўлення волі ў калоніі ва ўмовах узмоцненага рэжыму. Знаходзіцца ў папраўчай калоніі №15.
Аліса Поль, Беларускае Радыё Рацыя.
