Па «справе Гаюна» пад вартай знаходзіліся не менш як 183 чалавекі. Пра гэта паведаміў Праваабарончы цэнтр «Вясна». Падкрэсліваецца, што гаворка ідзе толькі пра пацверджаных фігурантаў — насамрэч колькасць затрыманых можа быць значна большай. У пачатку лютага праваабаронцы паведамлялі мінімум пра 175 чалавек.
Паводле іх інфармацыі, з пачатку года былі затрыманыя новыя фігуранты, а суды па гэтай справе праходзяць амаль штодня. У «спіс экстрэмістаў» МУС уключылі 155 чалавек, асуджаных за «садзейнічанне экстрэмізму». Большасць з іх праходзілі па «справе Гаюна».
Як адзначаюць праваабаронцы, пераважна абвінавачаным прызначаюць так званую «хатнюю хімію», аднак ёсць і выпадкі прысудаў з пазбаўленнем волі.
«Беларускі Гаюн» — маніторынгавы OSINT-праект, які адсочваў ваенную актыўнасць расейскіх і беларускіх войскаў. Група была створаная напярэдадні расейска-ўкраінскай вайны актывістам Антонам Матолькам. У пачатку лютага 2025 года сілавікі атрымалі доступ да чата з ботам праекта, пасля чаго «Беларускі Гаюн» абвясціў пра спыненне сваёй дзейнасці.
