Праваабарончая супольнасць Беларусі прызнала палітзняволенымі Рамана Забелу, Іллю Палонскага, Максіма Назарчука і Дар’ю Мандзік. Гэта архітэктары, арыштаваныя па выніках лютаўскага рэйду сілавікоў.
Ім усім інкрымінуецца ч. 1 артыкула 342 Крымінальнага кодэкса («Групавыя дзеянні, якія груба парушаюць грамадскі парадак»).
Архітэктары ў СІЗА №1 на вуліцы Валадарскага ў Менску.
Нагадаем, што 14-16 лютага ў Менску адбыліся масавыя затрыманні і вобшукі ў архітэктарскай суполцы. Частка з затрыманых атрымала суткі, цяпер сталі вядомыя імёны тых, на каго заведзены крымінальныя справы.
Паводле адной з версій, падставай для затрымання адмыслоўцаў стала фотаграфія з маршаў у 2020 годзе. Падчас пратэстаў архітэктары і праектыроўшчыкі ішлі па Менску асобнай калонай.
