Расейскую журналістку завочна асудзілі за «тэрарызм». Яна заклікала пісаць беларускім «рэйкавым партызанам».
Рэдактарка расейскага выдання Doxa Марыя Меньшыкава засуджана завочна да 7 гадоў пазбаўлення волі за заклікі пісаць палітвязням. Пра гэта паведамілі “Сеткавыя свабоды”.
Другі Заходні акруговы вайсковы суд у Маскве прызнаў яе вінаватай паводле ч. 2 арт. 205 КК РФ («Акт тэрарызму»). Падставай для пераследу журналісткі паслужылі дзве публікацыі, размешчаныя летам 2022 году ў сацыяльнай сетцы «УКантакце».
У адным паведамленні Меньшыкава заклікала пісаць лісты расейцам Дзянісу Сердзюкову, Іллю Фарбэру і Дзмітрыю Ляміну, асуджаным за падпал вайсковых камісарыятаў. У другім запісе ў сацыяльнай сетцы журналістка заклікала пісаць беларускім палітвязням Дзянісу Дзікуну, Дзмітрыю Равічу і Алегу Малчанаву, якім прысудзілі доўгія тэрміны зняволення ў «справе светлагорскіх партызанаў».
З 2022 году да праяў «тэрарызму» у РФ прыраўноўваюць публічныя паведамленні з «апраўданнем тэрарызму ў інтэрнэце».
