Савет Рэспублікі 20 чэрвеня ўхваліў праект закона «Аб амністыі ў сувязі з 80-годдзем вызвалення Беларусі ад нямецка-фашысцкіх захопнікаў», паведамляе прэс-служба верхняй палаты Нацыянальнага сходу.
Законапраект быў прыняты ў двух чытаннях Палатай прадстаўнікоў 30 траўня. Як паведамлялася, амністыя будзе прыменена да 7.850 асуджаных. Прадугледжваецца, што ад пакарання будзе цалкам вызвалена 2.090 чалавек, з 800 асоб здымуць не адбытую частку ўмоўнага пакарання, з 40 — пакаранне ў выглядзе арышту. Для 260 чалавек прадугледжана замена пазбаўлення волі на «больш мяккае пакаранне», 4.550 асобам тэрмін пакарання будзе скарочаны на 1 год.
Умовай для прымянення амністыі названы «поўнае пакрыццё шкоды, прычыненай злачынствам, станоўчая характарыстыка асобы ў перыяд адбываньня пакарання». Пры гэтым падкрэсліваецца, што «да асоб, якія маюць дачыненне да экстрэмісцкай і тэрарыстычнай дзейнасці», амністыя прыменена не будзе.
Беларускае Радыё Рацыя
