«Працяг і паскарэнне працэсу вызвалення вязняў стаў бы прыдатным фонам для будучага агляду сітуацыі з правамі чалавека ў Беларусі», — заявіў спецыяльны дакладчык ААН Нілс Муйжніекс з нагоды афіцыйнага Дня незалежнасці Беларусі.
Ён адзначыў, што ў лістападзе 2025 года Беларусь пройдзе чарговы цыкл Універсальнага перыядычнага агляду Рады правоў чалавека ААН. Працэс вызвалення павінен працягвацца і тычыцца ўсіх, хто несправядліва пераследуецца, асабліва тых, у каго праблемы са здароўем.
Муйжніекс падкрэсліў, што агульная колькасць палітвязняў у краіне застаецца значнай: больш за 1100 чалавек знаходзяцца ў месцах зняволення за рэалізацыю сваіх грамадзянскіх і палітычных правоў, многія з іх пакутуюць ад пагаршэння фізічнага і псіхічнага здароўя праз жорсткае абыходжанне і дрэнныя ўмовы ўтрымання, што выяўляецца ў недастатковым харчаванні, неадэкватным медычным абслугоўванні, забароне на атрыманне замежнай гуманітарнай дапамогі.
Беларускае Радыё Рацыя
Фота: spring96.org
