Польскія службы «атрымалі інфармацыю пра тое, што прадстаўнікі Каардынацыйнай рады Беларусі ўжо некалькі дзён ня могуць звязацца са старшынёй рады Анжалікай Мельнікавай», паведаміў прэсавы сакратар міністра ўнутраных спраў і адміністрацыі Польшчы Яцэк Дабжыньскі.
«Згодна з данымі польскіх і партнёрскіх службаў, гэтая асоба знаходзілася па-за межамі Польшчы на працягу многіх тыдняў. Польскія службы будуць падтрымліваць дзеянні службаў іншых краін і Каардынацыйнай рады Беларусі для высвятлення месцазнаходжання спадарыні Мельнікавай», — напісаў ён 29 сакавіка на сваёй старонцы ў сацыяльнай сетцы Х.
У сваю чаргу Каардынацыйная рада просіць давяраць толькі тым звесткам, якія сыходзяць з афіцыйных крыніц, бо на сённяшні момант вядзецца следства па факце знікнення Анжалікі.
Як паведаляе Інтэрыя.пл, дочкі Мельнікавай таксама прапалі без вестак. У эфіры польскага тэлеканалу TVN24 кіраўнік Народнага антыкрызіснага ўпраўлення Павел Латушка заявіў, што былы муж Анжалікі Мельнікавай выехаў у Беларусь. Гэтую ж інфармацыю ўчора пераказвалі «Белсату» іншыя крыніцы.
Нагадаю, што напярэдадні ўвечары Павел Латушка паведаміў, што Мельнікавай няма на тэрыторыі Польшчы, сувязь з ёй адсутнічае з 25 сакавіка.
Пасля знікнення спікеркі Каардынацыйнай рады Анжалікі Мельнікавай знік і доступ да рахункаў структуры, пра гэта пісала «Наша ніва».
Каардынацыйная рада прызначыла Стусю Гліннік выконваючыую абавязкі спікеркі замест Анжалікі Мельнікавай.
