На 500 экзэмпляраў кніг беларускіх пісьменнікаў стала больш у бібліятэцы Таварыства беларускай культуры ў Літве. Жонка беларускага патрыёта Йозаса Рыбікаўскаса Ірэна Рыбікаускене перадала таварыству ўвесь архіў свайго мужа разам з дэдыкацыяй.
Паводле старшыні Таварыства беларускай культуры ў Літве Аляксандра Адамковіча, для Ірэны Рыбікаускене было важна перадаць беларусам кніжны архіў мужа і яшчэ адну значную сямейную рэліквію:
– Перадала таксама з архівам і галоўную рэліквію сям’і – гэта бел-чырвона-белы сцяг, сапраўдны сцяг Вольнай Беларусі, а не чырвона-зялёную анучу, як тут некаторыя яшчэ захоўваюць, а сапраўдны беларускі сцяг. Гэтым таксама шмат сказана, што нават тады ён яго перазахоўваў і галоўнае, што меў у сябе.
Як дадае Аляксандр Адамковіч, Йозас Рыбікаўскас вельмі граматна збіраў сваю бібліятэку, ім перадалі ў спадчыну ўсе тамы збору твораў Уладзіміра Караткевіча, Якуба Коласа, Янкі Купалы, Максіма Гарэцкага ды іншых беларускіх аўтараў.
Цалкам матэрыял:
Беларускае Радыё Рацыя
Фота з архіва Аляксандра Адамковіча
