Пракуратура Турцыі прыслала афіцыйнае пацвярджэнне, што беларускі палітуцякач Анатоль Котаў выехаў праз порт Трабзон увечары 21 жніўня. Пра гэта паведаміў у Фэйсбуку яго паплечнік Аляксандр Апейкін.
Адказ турэцкай пракуратуры не задаволіў Апейкіна: ён заяўляе пра нестыкоўкі. Улады Турцыі, кажа Апейкін, заяўляюць, што выезд адбываўся добраахвотна. Аднак “пашпарт мог адбіцца ў сістэме без прад’явіцеля, бо ў порце Трабзон пашпарты здаюць пачкамі пры пасадцы на судна”.
Сярод іншага, ён звяртае ўвагу на нестыкоўкі часу перасячэння мяжы Котавым і яго больш познімі паведамленнямі яшчэ з Турцыі.
Акрамя таго, ён кажа, што ёсць сведчанні пра намер Котава вяртацца назад у Польшчу.
Нагадаем, Анатоль Котаў знік пад канец жніўня падчас паездкі ў Турцыю. Паводле звестак СМІ, ён адплыў з порта Трабзона на прыватнай яхце, якая нібыта накіроўвалася ў Сочы.
Беларускае Радыё Рацыя
