“Экстрэмісцкімі матэрыяламі” ў Беларусі суд прызнаў YouTube-канал з ролікамі пра спосабы пазбегнуць службы ў войску, паведамляе пракуратура. Гаворка ідзе пра канал ELGAR, які мае 1970 падпісчыкаў.
У пракуратуры заяўляюць, што на гэтым YouTube-канале размяшчаюцца відэаролікі, “у якіх аказваюцца кансультацыйныя паслугі грамадзянам па ўхіленні ад праходжання тэрміновай ваеннай службы па медыцынскіх падставах: “Як адкасіць ад войска па дурцы?”, “Як адкасіць ад войска 2024. Найлепшы метад”, “…Як я адкасіў” ды іншыя. Там жа рэкламуецца платная паслуга аб аказанні індывідуальнай дапамогі”.
Заяву ў суд аб прызнанні канала экстрэмісцкім накіравала пракуратура Калінкавіцкага раёна Гомельшчыны. Суд задаволіў гэты пазоў.
Варта адзначыць, што ролікі на гэтым YouTube-канале былі арыентаваныя пераважна на грамадзян Расеі.
Беларускае Радыё Рацыя
