У Вярхоўным судзе Беларусі пачынаецца першы працэс над памерлым чалавекам. Уладзіміра Катрука абвінавачваюць «ва ўчыненні злачынства, прадугледжанага артыкулам 127 КК Рэспублікі Беларусь (генацыд)», – гаворыцца ў паведамленні прэс-службы суда.
Магчымасць весці крымінальнае расследаванне ў дачыненні да памерлых людзей і судзіць іх з’явілася ў Беларусі летась – пасля ўнясення адпаведных паправак у Крымінальна-працэсуальны кодэкс.
Уладзімір Катрук нарадзіўся ва Украіне. Падчас Другой сусветнай вайны ён служыў у 118-м батальёне шуцманшафта і, паводле дакументаў КДБ, удзельнічаў у карнай аперацыі ў Хатыні. Пасля Другой сусветнай вайны ён перабраўся ў Канаду. Памёр ад інсульту ў траўні 2015 года. Незадоўга да яго смерці Расея прасіла выдаць Катрука для суда. Але на фоне анексіі Крыма канадскі ўрад праігнараваў гэтую просьбу.
Беларускае Радыё Рацыя
