У Гомельскай вобласці заявілі пра “стабільную радыяцыйную абстаноўку” пасля атакі дрона на ЧАЭС. Прадстаўнік Гомельскага аблвыканкама Дзмітрый Руткоўскі распавёў, што спецыялісты пастаянна вядуць маніторынг сітуацыі ў рэгіёне.
Пра атаку расейскага ўдарнага дрона на ЧАЭС паведаміў прэзідэнт Украіны Уладзімір Зяленскі. Паводле яго слоў, напад адбыўся ў ноч на 14 лютага. Удар прыпаў на саркафаг, які “беражэ свет ад радыяцыі разбуранага чацвёртага энергаблока ЧАЭС”. “Гэты саркафаг Украіна будавала разам з іншымі краінамі Еўропы і свету, разам з Амерыкай — з усімі, хто хоча сапраўднай бяспекі для людзей”, — адзначыў Зяленскі. Прэзідэнт Украіны заявіў, што радыяцыйны фон не падвышаўся, нягледзячы на “істотныя пашкоджанні” саркафага.
