У сталіцы Польшчы 28 сакавіка прайшоў марш беларусаў і ўрачыстая частка святкавання ўгодкаў Беларускай Народнай Рэспублікі. Акцыя дэмакратычных сілаў з удзелам гістарычных рэканструктараў і Вольнага хору пакінула яркае ўражанне.
Сотні ўдзельнікаў выйшлі на вуліцы польскай сталіцы, каб разам адзначыць нацыянальнае свята, выказаць салідарнасць і нагадаць: барацьба за свабоду Беларусі працягваецца.
Да шэсця далучылася Святлана Ціханоўская. Разам з беларусамі яна прайшла па цэнтры Варшавы пад бел-чырвона-белымі сцягамі — сімвалам стойкасці, годнасці і надзеі. Удзельнікі маршу пранеслі 330-метровы сцяг, а саму акцыю суправаджалі музыка, выступы артыстаў і кірмаш беларускай супольнасці.
У адзначэнні таксама ўзялі ўдзел польскія палітыкі і грамадскія дзеячы, у тым ліку Гжэгаж Схетына — старшыня Камітэта па замежных справах Сената Польшчы, былы міністр замежных справаў, а таксама дэпутат Сейма Аліцыя Лепкоўска і грамадска-палітычны дзеяч Адам Міхнік.
Напрыканцы шэсця Святлана Ціханоўская звярнулася да прысутных:
«Мы выходзім, таму што нельга не выходзіць. Нельга сядзець, маўчаць, проста перачакаць. Ніхто акрамя нас саміх, беларусаў, свабоду за нас не здабудзе.
Мы выходзім сёння за нашых палітвязняў… І мы будзем выходзіць, пакуль кожны і кожная не апынецца на волі.
Мы выходзім, каб аднавіць справядлівасць. Каб спыніўся тэрор. Мы патрабуем поўнай палітычнай амністыі.
Мы выходзім — у рэшце рэшт, проста таму, каб пабачыць адно аднаго. Пагаварыць. Натхніцца. І падзякаваць.
І я веру, што ў нас усё атрымаецца. І разам мы ўсё адолеем!
Жыве Беларусь!»
Фота і відэа Беларускага Радыё Рацыя
