Раніцай 24-га лютага ўкраінскія актывісты абудзілі расейскіх дыпламатаў гукамі выбухаў, стрэлаў і сігналаў з паветра. А ўвечары каля амбасады Расеі ў Польшчы прайшла акцыя салідарнасці.
Да яе далучыліся палітычныя і грамадскія дзеячы, акцёры, журналісты. Распавядае суарганізатарка мерапрыемства, прадстаўніца аб’яднання «Еўрамайдан-Варшава» Вікторыя Пагрэбняк.
— Сапраўды, чорная дата для ўсіх нас. Мы разумеем, колькі бязвінных мірных жыхароў мы ўжо страцілі, наколькі чорнай стала дата 24 лютага для ўсёй Украіны і для ўсяго свету.
Мы хацелі ўшанаваць памяць гэтых ахвяраў расейскай агрэсіі не толькі за апошнія два гады, але і за апошнія 10 гадоў — столькі доўжыцца вайна. Мы таксама хацелі гэта падкрэсліць, што вайна не скончылася, і хацелі абудзіць свет, каб ён не забыўся, што Украіне сёння як ніколі патрэбна наша падтрымка
Па падліках арганізатараў, ва ўкраінскай акцыі ў Варшаве прынялі ўдзел каля 20 000 чалавек.
Марына Савіцкая, Беларускае Радыё Рацыя
