Гарадзенскі абласны суд засудзіў палітвязня Сяргея Чабоцьку паводле арт. 361-1 КК (стварэнне экстрэмісцкага фармавання).
Рэдактару прызначылі тры гады і шэсць месяцаў пазбаўлення волі ў калоніі ва ўмовах узмоцненага рэжыму і штраф 1000 базавых велічыняў.
Паведамляецца, што ў судовым паседжанні мужчына віну не прызнаў.
Паводле матэрыялаў справы, Сяргей Чабоцька «супольна з іншымі асобамі стварыў сайт S13 і аднайменныя рэсурсы, дзе публікаваліся заклікі да гвалтоўнай змены канстытуцыйнага ладу, абразы прадстаўнікоў улады і паклёпніцкія сведчанні датычна прэзідэнта Беларусі».
Рэдактара папулярнага гарадзенскага блогу S13 затрымалі 23 кастрычніка 2024 года. Яго спярша тройчы судзілі па адміністрацыйных артыкулах — за “распаўсюд экстрэмісцкіх матэрыялаў” і “пікет” у інтэрнэце. Напрыканцы кастрычніка стала вядома, што кантэнт блогу S13 і яго сацсеткі прызнаныя “экстрэмісцкімі матэрыяламі”.
