Вацлаў Арэшка, вядомы актывіст прафсаюзу РЭП, адзначыў сваё 70-годдзе ў турме.
Гэта ўжо трэці раз, калі палітвязень праводзіць свой дзень нараджэння за кратамі.
Арэшка быў засуджаны на 8 гадоў зняволення і цяпер утрымліваецца ў калоніі №22 пад Івацэвічамі. З узростам актывіст быў вызвалены ад працы на вытворчасці, але яго стан здароўя патрабуе пастаянных візітаў да лекараў. Ён мае праблемы са зрокам, а лісты дамоў яму пішуць іншыя вязні па ягонай просьбе.
Вацлаў Арэшка быў затрыманы ў 2022 годзе разам з іншымі вядомымі актывістамі і кіраўнікамі беларускіх незалежных прафсаюзаў. Ён быў засуджаны па трох артыкулах Крымінальнага кодэкса, у тым ліку за стварэнне “экстрэмісцкага фармавання”.
Паводле Беларускага ПЭНу, Вацлаў Арэшка вядомы не толькі як актывіст, але і як дзеяч беларускай культуры. Ён працаваў у розных культурных установах, займаўся літаратурнай дзейнасцю і распрацаваў курс па гісторыі культуры Беларусі.
